經常於日本綜藝節目或日本雜誌中，見到當地女士超強嘅家政料理手藝，的確令人讚嘆非常！但原來佢哋背後都有一啲小幫手，今次就為大家介紹五款日本家庭常備嘅家政小工具，令大家都可以瞬間擁有超強技藝。
1.切片切蔥器
日本幾乎每家每戶都有，無論係小黃瓜或蔥花，都可以切成大小一樣而且形狀漂亮，對刀工一般嘅人係超級好幫手。將蓋打開後，係蔥段上面畫幾下就完成，非常方便。
2.家用熱熔封口器
呢款封口器一推出後立即造成搶購熱潮！而且係日本主婦票選最想要嘅廚房小幫手第一位！只要喺一邊壓住，然後滑到另外一邊，就可以密封完成。簡直就好似未開封過一樣，真係好實用啊！
3.玉子煎蛋器
如果要煎日式玉子燒，通常都會去買一個玉子燒專用長方形嘅平底鍋。但如果無日本人做玉子燒頻率咁高，咁呢個方形玉子燒專用器就啱晒你啦！只要將呢個小幫手放係普通圓形平底鍋中間，塗上油再倒入蛋漿即可，方便又易用。
4.撈浮渣蓋
相信好多人煮飯嘅時候，無論係熬湯或燉物，都會花好多時間撈走浮係上面嘅渣滓。由大創推出嘅呢款簡易撈浮渣蓋子，連明星向井理都對此讚不絕口。
5.防止湯汁溢出器
相信好多人都試過煮麵時，因為水滾得太快令湯汁溢出，到最後要清洗爐頭爐面，非常麻煩！大創推出呢個小物「 KOKUKOKU君」，就可以幫到手啦！佢其實係一塊圓形長角鐵片，只要將佢放入鍋底，即使水滾都唔會溢出，真係好神奇！
經過以上日本婦女絕密公開之後，大家都可以成為家政料理高手呢！
