寒冷冬天，吹起陣陣北風，皮膚難免感到乾燥痕癢，所以大家都會常備潤膚霜。不論男女老少，潤唇膏都係冬天恩物，但唔好以為潤唇膏只有滋潤雙唇嘅功用，其實仲有好多隱藏用法，就等小編為大家娓娓道來啦！
1.控制食慾
根據美國一所大學研究結果顯示，薄荷嘅香氣有助抑制食慾及減低飢餓感。所以當我地感到飢餓嘅時候，不妨利用薄荷味潤唇膏嚟控制食慾，相信日積月累之後，仲可以有助減肥添！
2.取代胭脂
萬一女士們發現身邊欠缺胭脂，可以試下利用有色潤唇膏取代，相信會令你有意想不到嘅效果。因為潤唇膏比胭脂更顯色，而且更持久，有助提亮妝容丶增添神采。
3.做眼影打底霜
如果想整天眼影都不脫妝，可以先喺用眼影之前，塗上一層薄薄嘅透明色潤唇膏，不單止可以為眼蓋作一層保護，而且有定妝效果，令眼影更持久耐看。
4.令頭髮順滑
相信唔少朋友都試過晚上洗頭之後，將頭髮吹至順直，但往往係瞓醒嘅時候，頭髮就變得雜亂無章丶非常毛燥。如果你都有同樣問題，可以將潤唇膏搽喺頭髮乾燥嘅部份，就可以瞬間變得順滑。
5.治療小傷口
冬天特別容易擦損手腳，又容易被紙張割傷，對於呢類型小傷口，潤唇膏就幫到你啦！可以係小傷口上塗適量嘅潤唇膏，有助加快傷口癒合，而且可以止痛。不過較大嘅傷口，就建議及早求醫啦！
原來只要我哋將潤唇膏使用得宜，就可以將佢發揮到最大功效，呢樣廉價好幫手，大家以後記得要常備一支係身邊啦！
