每個人都想生活快樂幸福，但香港人出名生活急促又壓力大，如果要為自己嘅幸福指數打分，你又會俾幾多分呢？
聯合國將每年嘅3月20日定為國際幸福日(International Day of Happiness)，今年度《世界快樂報告》早前出爐，報告調查全球156個國家由2017至2018年間嘅快樂水平，評分準則由人均生產總值(GDP)、人均健康及壽命、社會支援、自由度、慷慨度、貧富程度六個範圍組成。
今年香港得分為5.43，排名第76位，比舊年下跌5位。貧富懸殊、樓價高、中港矛盾等社會問題日趨嚴重，香港人自然愈嚟愈唔開心。反觀台灣就排第26位，比舊年躍升7位，為亞洲第一，中國大陸則排86，排最尾嘅係非洲國家——蒲隆地。
移民外國生活係唔少香港人嘅夢想，咁邊幾個國家被視為全球最快樂呢？根據排名結果，芬蘭以7.632分奪得第一，較舊年排名急升4名，2至3位就由挪威、丹麥包辦。北歐國家嘅唯美氛圍一直令人憧憬，報告亦指出，除咗良好福利水平，親近大自然嘅生活環境係芬蘭擁有高幸福指數嘅重要原因。
資料來源：《2018年世界快樂報告》
