好多女生告別校園後踏入社會，都花大量時間為自己事業打拼，有時更加令自己社交圈子越縮越小，從而忽略好多搵合適對象嘅機會，究竟幾時先係女性適婚年齡呢？以下有五個由專家分析嘅要點，從中大家都應該會略知一二。
1）身體許可嘅適婚年齡
女人到25歲後身體會衰老速度比以前快，正所謂「有仔趁嫩生」，但今時今日大部份人要忙於工作儲錢，結婚相信大概要30歲，婚後又要二人世界幾年，大約到33歲先計劃生肓，但又未必一擊即中，加上過咗30歲身體復原能力較慢，所以變成年齡許可結婚，但身體未必許可生育嘅問題。
2）專注事業
大部份女生24歲大學畢業後，投入社會工作兩三年先剛好有事業基礎，假若要碰上另一半大家年齡相若，想喺30歲前結婚，往往未有置業能力，都要同其家人一齊住，除非你唔介意日日見到對方父母，朝夕相對，否則都好難30歲前結婚。
3）金錢問題
現在樓價屢創新高，首期至少要預備30萬，如果二人結婚唔擺酒又唔買樓至少都要12-13萬。普通白領一族，男女薪金大約3-4萬，扣除家用、衣食住行已所剩無幾，仲要儲錢，所以想28歲結婚，真係想得太美好吧！
4）對象問題
如果讀書時認識到合適對象，青梅竹馬地畢業，然後投身社會工作一齊成長，直至結婚當然非常幸運。但如果出投身工作後分手又或者從來無拍拖嘅女士，要換多兩個男朋友都已經30歲啦！仲要考慮適婚年齡問題嗎？
5）住屋問題
現今生於香港最困擾嘅住屋問題，正正係結婚與否嘅考慮因素，如果雙方都唔介意與對方父母同住，就真係可以隨時結婚！又或者可以好似時下某部分已婚人士一樣分開住呢！
總括而言，如果要喺適婚年齡前結婚，最基本要有高薪厚職丶遇到合適終身伴侶，而且清楚知道自己需要嘅生活，達到以上要求就可以安心踏上人生另一階段了。
