好多人都到過首爾旅遊，但未必人人都逛過首爾嘅夜間市集！最近喺韓國年輕人中極受歡迎嘅夜晚活動非逛夜市莫屬，而今年2018年嘅夜貓子夜市亦即將於3月30日再度回歸，當中集結各種美食丶特色手工藝品，以下就為大家整理出詳盡嘅夜市攻略，即將要去韓國嘅朋友記得一定要去朝聖一下啦！
1）汝矣島漢江公園
地點：汝矣島漢江公園水光廣場
時間：18:00 – 23:00
漢江絕對係適合家庭、情侶、朋友遊覽嘅郊遊景點，每年都係舉辦夜貓子夜市最熱門地點！往年以World Night作主題，引來大量人潮，遊客除咗可以逛逛手作市集、美食餐車，更可觀賞街頭表演及漢江美景！
2）東大門設計廣場(DDP)
地點：東大門設計廣場(DDP)
時間：19:00 – 24:00
聚集最多年輕人嘅DDP市集，除咗攤位之外，有時會舉辦時裝或B-boy表演，上年市集名更直接取為青春Runway夜市，果然係年輕人最愛嘅潮流地之一。
3）清溪川
地點：首爾市鐘路區瑞麟洞14號
時間：16:30 – 21:30
清溪川嘅穿越時空夜市係去年舉辦夜市中最富韓國本土風情嘅一個，不單止有各式美食丶設計藝術品，而且可以觀賞美麗嘅清溪川夜景，相當迷人。
4）盤浦漢江公園
地點：盤浦漢江公園月光廣場
時間：18:00 – 23:00
上年盤浦市集以浪漫月光夜市作為主題，不但有盤浦大橋嘅月光彩虹噴泉表演，仲會時不時有街頭藝人係路上表演爵士樂，係最適合約會嘅市集，未知今年又會點樣點綴哩個浪漫嘅約會勝地呢！
5）文化儲備基地
地點：首爾市麻浦區繒山路87
文化儲備基地係由上年年底開始新崛起嘅觀光地點，今次更被加入到首爾夜貓子夜市嘅舉辦地點中。哩度前身係麻浦石油儲備基地，過去四十年一直被嚴格規範著出入，但由2017年9月1日開始就脫胎換骨變成舉辦慶典丶表演丶展覽丶市集嘅複合文化空間。
由傍晚開始至早上就消失嘅首爾夜貓子夜市預計於2018年3月30日至10月28日每周五、六、日舉行，大家快啲趁著假期一遊啦！
