最近好多韓星及時裝達人都紛紛穿上最新一季不同波鞋款式，齊齊預告潮流趨勢！天氣又逐漸回暖，大家係時候為轉季著手，而韓國各大波鞋品牌都開始推出春季款式，如果你仲猶豫緊入手邊款，不妨參考以下介紹，揀返對新鞋一歩一步踏入春天！
1）Watco EXCELSIOR餅乾鞋
Watco EXCELSIOR鞋款一向踏實易襯，屬於崇尚簡約風韓妹嘅心頭好！踏入2018春季更推出多款新色鞋履，其中以草綠色及沙漠色尤其突出。最簡單嘅搭配可以利用全黑運動服再加配，如果想活潑一點，可以選擇糖果色系嘅運動裝，配同色系粗腰帶，同樣充滿春日氣息。
2）Vans Old Skool春季系列
不用多介紹，近幾年大家都應該注意到Vans Old Skool強勁熱潮！新季度開始，韓妺們都利用街拍照丶個人平台向大家展示熱潮並未有減退！所以如果你仲未入手，可以喺春季新色鞋款中挑選一下，今季新推黃色及綠色非常出色！只要上身衫與鞋撞色就係絕對唔會出錯嘅配搭啦！
【延伸閱讀】今季大熱「Dad Sneakers」該怎樣搭配？
3）NEW BALANCE經典840+300粉嫩新色
New Balance今季請嚟國民妹妹IU任代言人，以青春甜美形象演繹經典840及300最新粉色鞋款，春系新色以灰色作主調，配上粉藍或粉紅作點綴，簡單又易襯，任何造型都唔成問題。參考IU示範，可以用最基本襯法以同樣粉色系嘅服飾及畫家帽作配襯840粉紅色鞋款，完成一個超甜美造型！如果晚上天氣較涼，就可以套一件粉藍色連帽衛衣，或者裡面加一件白色打底衫，增添層次感，而下身穿上短褲可有助拉高比例，再選配粉藍色840撞色一下！
4）FILA RAY
FILA RAY特色在於其鞋形，鞋形製造成圓圓嘅感覺，可以令雙腳睇落細小一點，加上鞋身波浪花紋設計使用反射物料，時尚感大增，而鞋底部分除加厚外，中間仲有一個弓形設計可以令你穿著長時間都唔會覺得攰，簡單鞋底外型令你走路更舒適，男女都一樣適合，絕對係情侶鞋款之首選。
5）Converse One Star Pinstripe系列
Converse一直都係潮流人士恩物，無論低筒或高筒都係韓妹經常著用嘅鞋款。新一季度更推出One Star Pinstripe系列，利用鮮豔色調營造春天感覺。今季鞋款鞋身用上麂皮，更添復古感覺，而鞋側白邊以Converse串標作點綴，玩味十足，如果自問追上潮流就一定要留意啦！
迎接春夏不妨揀選一啲搶眼鮮艷顏色嘅鞋款作配襯，只要掌握到整體打扮盡量不超過三種顏色，配搭上就唔會失手啦！
