航空公司越來越多，廉價航空嘅票價又非常吸引，促使我哋更容易可以乘搭哩種方便又快捷嘅交通工具，但你有幾了解飛機呢？飛機上有好多小細節可能係大家從來未認真觀察過，今次小編就要為大家解答一系列飛機上嘅冷知識，下次乘搭飛機嘅時候可以跟身邊朋友分享一下啦！
1）飛機機窗上神秘小氣孔
飛機機窗下方都有個小透氣孔，雖然毫不起眼，但非常重要！用以擔任平衡氣壓作用，由於飛機窗係雙層結構，外層玻璃要抵抗極大氣壓，窗上小孔則用作平衡機艙內丶外氣壓。兩層玻璃承受不同壓力及溫度，有時會產生水氣，所以小孔作用就好似幫飛機呼吸一樣，防止玻璃起霧。
2）正副機師有不同飲食？
大家對於飛機駕駛員嘅工作內容係未都感到好奇呢？飛機上正副駕駛員嘅食物必須不一樣，因為如果其中一人食物中毒，仲有另一人可以輔助駕駛飛機，為以確保飛行安全及穩定。
3）飛機上會產生感官變化
身處高空中，感官會容易產生錯覺，好似原本以為暈機嘅原因係空氣循環流動造成，但其實飛機循環流動嘅空氣係非常乾淨，相反有時因為乘客所觸摸嘅東西令人暈機，例如枕頭丶扶手丶洗手間水槽等等。
4）飛機上點解不准抽煙
抽煙本身對身體丶環境及其他人都有壞影響！係飛機上，除咗因為避免火災發生及二手煙問題外，飛機上禁煙真正原因係經濟因素，由於飛機上空氣係使用過濾系統不斷過濾保持乾淨，而煙霧會導致過濾系統壽命縮短，所以航空公司要實施禁煙政策！
5）飛行期間意外身故
生老病死無常，若有人係飛行途中意外身亡，空服人員會將遺體移到無人坐嘅座位或頭等艙，如果飛機上無空位，就會用安全帶繫好遺體，並用毛毯蓋住。當然飛機上有人身故嘅消息會保密直至飛機降落後宣布，以避免引起不必要恐慌。
睇完以上各個飛機冷知識，會唔會又大開眼界呢？下次搭乘飛機嘅時候可以多注意小細節，相信會更有所領悟。
