係學生年代嘅時候，學生妹只會諗去邊度慶祝，又幾點鐘係社交網站出Post晒命，幾點放Dinner相上好、幾點放禮物相上去好、內文寫乜好、Hastag寫乜好？加多幾句獨有英文就更加好。至於學生哥當然係諗，點樣用最低Budget，去滿足女神嘅要求啦。
但去到成年人返工嘅時候，大家已經唔係諗點樣慶祝先，係先望望個年曆表，究竟2月14係平日定係假日先？跌左落星期六、日都Ok，起碼唔洗對同事，但星期一至五就大件事了，女人俾人知無花收咪好樣衰？應該咁講，係其他女同事有花收，自己無花收嗰陣就真係好樣衰！又或者咁講，連公司件油炸豬扒都有花收，自己無花收嗰吓就真係想捐入廁所個馬桶入面個窿。
至慘係香港啲廢男人，成日問女朋友仔需唔需要送花去佢屋企？咁女仔梗係答「唔洗啦，咪晒錢啦……」，但唔知點解香港啲廢男人真係會信唔洗，結果每年2月14朝早，全公司個個都收到花，即刻要Whatsapp個男朋友，快啲送花嚟。
所以每年情人節旺角花墟朝早，都會有一大堆男仔係度揀緊花，而呢堆男仔就係一班以為真係唔洗買花送去女朋友公司嘅「毒男」。
一般OL就話有男朋友啫，但老姑婆女上司又點會有女朋友呢？見到Office出面成班妹妹都有花收，嗰陣葡萄味真係由佢個經理房傳到去Reception。自己又無男朋友，結果咪要自己出手訂囉。根據香港非官方紀錄及統計，有一名肥腫口臭老姑婆，竟然連續5次俾人踢爆自己送花俾自己。
第一年：送花人係自己名
如果各位男士有訂過花，就梗係會係送花人填上自己個名啦。老姑婆第一年竟然係收花人同埋送花人都寫左自己個名「Mary」，哈！大家都知送卡人嗰隻卡貼係當眼位置，全公司一見到，送花人同收卡人個名係同一個名，即刻忍唔住笑左出嚟，結果當然成班OT啦。
第二年：改左名後仍出事
今次Mary姐梗係唔會將自己個名寫落送卡人到啦，送卡人改左名叫乜呢？總之係男仔啦，重點唔係呢度啦。當Reception姐姐一知道阿姐有花收嘅時候，已經忍唔住笑出嚟！係，張卡送花人個名係男仔名，但一般卡，除左要填送卡人嘅名之外，仲要填聯絡電話，阿姐竟然填左自己手提，結果嗰日所有花都Hold咗係Reception，唔敢送入去Office。
第三年：改埋電話號碼都係出事
今次個電話號碼梗係重點啦，當然唔再係阿姐嘅電話號碼，同事用133打去，都係男人聽喎。莫非阿姐真係有男朋友？我同你可能信，啲同事就一定唔信。結果係Facebook 搜尋吓個送花人嘅電話號碼，有個同阿姐同姓嘅男人，但又無乜相，結果搵左個乞人憎嘅同事facebook add落去，結果對方接受，睇返Facebook啲相同資料，原來係阿姐嘅細路。至於呢位乞人憎嘅同事結果如何？當然同董伯伯嘅8萬5房屋政策一樣，已經唔存在喇。
第四年：無送卡人無電話都係出事
呢次Reception姐姐搵唔到任何送卡人資訊，就咁有個哥哥送上嚟，話係送俾Mary之後一支箭就走左。咁啱送花時，阿姐同一班同事開緊會，同事收到Reception姐姐嘅Whatsapp 群組通知，大家都唔知點好。估都估到9成9又係老姑婆自己文花俾自己，但今次一樣送卡人資料都無，點樣查證好呢？
結果開開吓會嗰陣，阿姐電話係咁響，響到阿姐忍唔住出去接。原來咁啱有個新入職嘅同事又叫Mary，Reception姐姐唔清楚束花係送俾邊個Mary，衝左出門問送花嗰位哥哥，收花嗰位Mary小姐姓乜，送花哥哥都唔清楚，打左返公司問。咁相信大家睇到呢度，都明白點解老姑婆電話係咁響。
第五年：阿姐真係收花
其實啲資深公司元老都商量緊，不如大家夾錢買花送俾老姑婆啦，可能哄得佢開心有得早走呢，但係民主投票下，花生友佔多數，結果大家決定唔會夾份買花俾阿姐，今年繼續等食花生。
今次公司已經搬左去另一個Office，無Reception，所有件都係直送入Office。突有人行入嚟話送貨，仲指明係公司執行董事Mary姐個名，成班同事即刻作法，金田一加福爾摩斯上身，諗下點樣破案。但阿姐個反應話俾我哋知，呢件貨唔係佢自己買俾自己，因為佢聽到同事話有貨收，開頭一面呆滯，之後成個人衝出房睇下有咩收，老肥婆跑步，真係生平少見。
(圖片來源：網絡)
講返主題，今年唔再係鮮花喇，係一件貨，用超靚花紙包住，係朱古力？係汽球？係手錶？係頸飾？全部同事都好緊張！大家圍住阿姐，等阿姐開出嚟究竟係乜……結果係花，唔係普通花咁簡單，係西蘭花！情人節阿姐收西蘭花！唔需要問邊個送，唔需要問阿姐得罪乜人，各位同事只需要打電話，取消今晚晚飯嘅Booking。
至於今年情人節係點﹖今年情人節係星期三……點解又係平日嚟……
