以音樂演繹電影起承轉合同角色嘅喜怒哀樂，往往係最扣人心弦，所以音樂電影一直都係歷久不衰嘅主題。今日想同大家介紹嘅就係2016年上映嘅《初戀無限Jam》。
電影嘅背景係80年代嘅都柏林，故事始於15歲嘅男主角Conor對女主角Raphina一見鍾情，搭訕時扮型話自己夾band，仲邀請對方做mv女主角，點知對方一口應承，Conor唯有硬住頭皮四圍搵人幫拖，唔單止組band唱歌，仲拍埋低成本mv，意念化妝服裝場境一手包辦，過程低能搞笑。同時穿插青春電影必有嘅校園欺凌、家庭糾紛、初戀同友情、成長嘅迷茫等題材，愈睇愈發現箇中有笑有淚。
《初戀無限Jam》劇照
戲中某啲情節用依家嘅現實濾鏡去睇，難免係有啲｢離地｣，男主角居然會因為女主角無心嘅一句就拎起自己從未掂過嘅結他，夾band搞音樂，不惜挑戰校規，唔介意出醜比人笑。而身邊嘅朋友竟然又會陪佢癲…但唔好忘記一眾主角只係班15-16歲少男少女，仲記唔記得當初嗰個情竇初開，戀愛大過天嘅自己？傻事做盡，都只係希望心儀對象開心。為咗對方做一啲從未做過嘅事，拼命將自己最好嘅一面表現俾對方睇，小心翼翼又笨拙，即使最後未能開花結果，但喺努力嘅過程中，你改變、成長，成為一個更好嘅人。電影動人之處，就係將初戀最青澀純真嘅感情表露得淋漓盡致。
Conor就係憑住一股傻勁，一份懵懂，用音樂去拯救自己，仲打動埋Raphina。全片都非常熱血勵志，令我諗起一句說話：「只要你真心想做一件事，全世界都會為你讓路」，可能你覺得太理想化，但人生本來就係一場未知結果嘅試驗，何況青春就係大把本錢去闖，將來你回頭，笑自己傻，但傻得可愛，亦都慶幸自己曾經跌趺撞撞，今日嘅自己先成形。沈佳宜講過：「人生本來就有很多事是徒勞無功的。」其實結果如何未必係最重要，過程精彩咪夠囉，下下都咁計較得與失先決定做唔做一件事，活得謹慎，未見得會活得開心。不如偶爾拋開世故嘅眼光同包袱，重拾青春嘅熱血，做自己想做嘅事，｢試下咋嘛，洗死咩？｣。
最後，電影嘅主題曲同插曲亦好高質，例如《Up》, 《Drive It Like You Stole It》, 《To Find You》，隨住電影嘅遞進有錦上添花之感。而《Go Now》更係由Maroon 5主唱Adam Levine演唱，歌詞好有意思。總之，我真係好推介大家睇呢套電影，大家唔好錯過！
