每次到台灣都會被當地嘅風土人情丶天然美景所吸引，療癒身心，但估唔到可能你經常擦身而過嘅車站，原來都隱藏着不少絕美秘境，以下為大家介紹五個美麗小車站：
1.宜蘭天送埤車站
地址：宜蘭縣三星鄉福山橫巷27-41號
日治時期為咗運送木材而建設嘅天送埤車站，而家已經無火車行駛，成為「火車到不了」車站。山林裡嘅雲霧配上淺藍色木建築，連偶像劇《下一站幸福》都嚟呢度取景，低調而優雅嘅日式車站，帶着一絲絲浪漫感覺。
2.基隆八斗子車站
地址：新北市瑞芳區北部濱海公路377號附近
基隆八斗子車站有「北部多良車站」美譽，開放式嘅月台伴著遼闊海洋，令迷人海景盡收眼底。曾經被廢站接近30年，係2016年重新通車，當時仲引起一輪搶拍熱潮，爭相搶拍火車穿梭山海嘅完美一刻，令人非常陶醉。
3.苗栗新埔車站
地址：苗栗縣通霄鎮3578 鄰 57 號
傳說中苗栗新埔嘅「無人小站」係台灣西部最靠近海邊嘅小站，站內無服務員，亦無剪票口，更加無喧嘩流動小販，走出車站就可以見到前往海邊嘅指示牌，因為人流唔多，可以安靜地飽覽無際海景。
4.苗栗崎頂車站
地址：苗栗縣竹南鎮仁愛路2386號附近
崎頂車站附近嘅崎頂子母隧道係網友熱搜嘅「龍貓隧道」，低垂圍繞嘅樹蔭遮住隧道口光線，好多人都嚟呢度拍攝光影意境照，而車站外海天一色嘅風景更係不能錯過，呢個無圍牆嘅秘境車站的確令人驚艷。
5.台東多良車站
地址：臺東縣太麻里鄉多良村瀧溪8-1號
要數到最美車站，點可以少得多良車站？位於山坡高處獨擁遼闊海景，多良車站可直接俯瞰廣闊太平洋，被鐵道迷封為「全台最美車站」。山與海交際，雖然無火車停靠，但山嵐與雲霧互相輝影，已經非常唯美！
無論係一家大細丶情侶拍拖甚至獨自流浪，以上秘境都值得一遊，將美好時光及美景一齊凝結於相片當中啦！
