日常生活中，難免製造大大小小不同家居垃圾，如果你未經考慮就將垃圾丟走，可能會後悔喎！因為原來只要加點心思，垃圾都可以變成有用嘅工具，依照以下方法就可以更物盡其用啦！
1.舊衣架
衣架係家居中最好用嘅收納工具之一。多餘衣架只要多加利用、加工，都可以成為相當實用嘅收納器，可以運用衣架摺成方便使用嘅形狀，再利用衣架製成瀝乾架，慳錢又環保。
2.飲品紙盒
大家都經常將飲完嘅飲品紙盒隨手一丟，其實只要將紙盒清洗乾淨，剪開後以迴紋針固定，再整齊地排列喺抽屜內，就成為方便實用嘅收納盒，作分隔收納用途，可以充分利用空間。
3.塑膠樽
塑膠樽絕對係最佳慳錢收納工具，不但質地軟容易剪裁，塑膠材質更可抗潮濕，所以適合放於冰箱內，收納各式調味品及食材。只要將剪裁好嘅膠樽，喺背面貼上雙面膠紙，再貼到牆壁或水槽上，即可用嚟收納物品，而且樽身透明，可清楚見到樽內物品，非常方便。
4.舊鞋盒紙箱
善用其堅硬厚實嘅材質，可自由拼裝或剪裁成為各種不同大小嘅實用收納器。依照收納空間大小，將鞋盒黏貼一齊，即成為收納盒。而紙箱嘅材質厚實堅固，不易變形或扭曲，所以都非常適合做抽屜收納隔板。
5.大容量膠樽
家庭裝塑膠樽容量大，只要將上半較窄嘅樽口處剪走，利用樽身寬大嘅底部就可以收納零碎物品。另外，亦可以善用塑膠樽本身圓弧形底部設計，將幾個大小相近嘅塑膠樽疊起，從而有效節省空間。
只要能夠掌握以上五種收納小貼士，不單止可以令房間更整齊，仲可以為環保出一分力，何樂而不為呢？
資料來源：
采實文化《【全圖解】聰明收納術》
