好多人認為頻繁地燙染髮或使用過量造型產品就係髮質受損元兇，但其實日常使用錯誤洗頭方式先至係傷害頭髮嘅真正兇手！以下五個錯誤洗頭習慣，未知你有犯到嗎？
1）每日洗頭
根據The New York Times指出不少人都養成每日洗頭習慣，有人甚至一日洗兩次頭，而研究指出，其實每星期只需洗頭三次就夠，實際可按個人髮質而定，例如油性髮質人士可每日洗，因為要重點洗走頭髮上油脂分泌，但其他髮質則只需隔日洗就足夠。
2）水溫過熱
大多數人都覺得用熱水沖涼係非常放鬆嘅事，所以洗頭都同樣用熱水，但熱水其實會對頭髮造成傷害，有機會燙傷頭皮，而且過熱水溫都令頭髮變得乾旱缺乏光澤，所以建議用適中溫水洗頭，令頭髮可以鎖住濕度。
3）太用力洗擦頭皮
按摩頭部可以令人更精神，所以不少人都會按頭，但有時會用指甲過度摩擦頭皮，令頭皮受損。其實頭皮好幼嫩，只需輕輕按壓已經足夠洗走污垢，而且應使用手指腹代替指甲去按，否則有機會產生頭皮屑。
4）用錯洗頭水
市面上有好多標榜不同功效嘅洗髮水，要好好選擇合適自己的，挑選護膚品同揀洗髮水一樣，需要考慮自己膚質及髮質，不同髮質需要使用不同種類洗髮產品，例如油性髮質可以選擇潔淨力強，乾性髮質則選擇保濕型，而轉季時候要更加留意頭髮狀況，或者需要轉洗頭水。
5）潤髮時間過短
好多人都知道洗頭時唔可以俾洗頭水停留係頭髮太耐，但相反護髮素竟然可以！唔好以為護髮素太潤，要趕快沖走，有專家建議，用護髮素後，可以再用闊齒梳來回梳順，然後俾護髮素停留約 5 至 7 分鐘先沖水，令髮絲有足夠時間得到滋潤。
學懂洗髮小常識後，唔好忘記洗髮之後頭髮護理程序，緊記要立即吹乾頭髮，同時亦避免紮起濕髮，咁大家就可以擁有光澤又亮麗秀髮啦！
