2017年已經進入最後倒數階段，除咗諗去邊倒數迎接2018之外，係咪都好應該認真地總結過去，為新一年好好計劃呢？參考以下呢幾個建議，可以幫你喺新一年一洗頹氣！
-
整理及拋棄舊物
迎接新一年，當然要嚟個大掃除啦！經過一年嘅堆積，屋企一定有好多｢呢樣唔捨得｣、｢掉咗好晒喎｣、｢第日仲有用｣嘅雜物。唔單止令屋企非常凌亂，望住佢哋亦容易｢睹物思人｣，陷入舊回憶停滯不前。過去已成過去，一於的起心肝掉晒所有無用嘅嘢，然後你會發現連思緒都一同被整理，唔再拘泥於過去！
-
改變形象/髮型
新一年係改變自己嘅好時機，一於由外表做起！對厭咗一成不變嘅髮型同著衫風格，不妨一刀剪斷千根煩惱絲，或者染上亮眼髮色，仲可以嘗試下唔同風格/從未試過嘅打扮。除咗可以更了解自己，有煥然一新嘅感覺，更加會帶俾人新鮮感同好感添！
-
調整心態
換咗髮型同掉咗啲身外物，就輪到清理心態上嘅垃圾啦！過去一年無論經歷咗幾多挫折、遇到幾多小人、有幾多遺憾，新一年都要忘記晒佢！人總需要勇敢生存，要學識培養樂觀嘅處世態度，遠離負面情緒。同時活在當下，把握每個機會唔好等自己後悔。
-
認清、訂立目標
回首2017年，有幾多個由年頭訂立嘅目標到頭嚟都係得個講字？要實現目標同計劃，首先要了解失敗原因，係咪因為訂立嘅目標太理想遙遠？抑或係時間分配唔好？定其實純粹係自己太懶？反省之後就可以從根本改善問題，好好計劃同管理自己。2018年，唔好再比夢想永遠都只係夢想啦！
-
培養興趣/改變生活方式
新一年唔好忘記要繼續增值自己，嘗試尋找同建立新興趣，從而產生對生活嘅滿足感，提升生活質素。埋頭苦幹成年，不妨調整步伐，花時間同珍惜嘅人相處、品嚐美食、欣賞自然美景，享受｢慢活｣啦。
(圖片來源：網上)
