話咁快就到12月，代表即將要迎接普天同慶嘅聖誕節！充滿浪漫氣氛嘅聖誕對於單身嘅朋友嚟講，可能會令佢哋難掩寂寞，不過如果佢哋身在韓國，或者會更加慘……
大家睇韓劇就知道韓國人非常強調男女朋友之間嘅節日，就連交往紀念日都記到實一實，所以好多韓劇入面都不乏成日聽到「今日係我哋交往第xx日啊！」等對白。更瘋狂嘅係韓國全年總共有13個情人節(仲有唔少非正式/新興節日)，即係起碼一個月有一個！而今日想同大家講嘅就係12月14日嘅擁抱情人節（Hug Day허그 데이）。
擁抱情人節係全年最後一個情人節，喺冬天嘅寒流底下，韓國男女朋友會毫不顧忌咁向全世界｢曬命｣，佢哋會喺公眾場所緊緊相擁，想抱幾耐就幾耐！以表達感激愛人一整年嘅陪伴、愛護、包容，同時亦承諾要一齊渡過未來更多嘅日子，所以對於由年頭甚至更早就開始交往嘅情侶嚟講意義非常之大！
其實韓國人出名鍾意｢放閃｣，街頭不時都見到情侶著住顏色甚至款式一樣嘅情侶衫、情侶鞋、情侶帽等等，一到情人節所有商店又會出售林林總總嘅朱古力同禮物，所以喺韓國做單身狗可以話係完全避唔開舖天蓋地嘅情人節攻擊。不過向好嘅方面諗，雖然寂寞咗少少，但至少保住自己個銀包嘛！咁就可以喺嚟緊聖誕留返啲錢買份禮物俾自己啦~同埋唔好唔記得12月14日要擁抱下自己啊！
