無論係一家大細，抑或係一大班朋友，只要聚埋一齊就一定需要娛樂。但一般黎講大家都只係識玩下層層疊、UNO、狼人，頂多可能都係玩下三國殺。作者有見及此，黎緊希望不時會同大家分享一啲有趣嘅遊戲選擇，等大家可以唔使玩黎玩去都係果幾樣啦！今日嘅主角就係好似層層疊嘅籤籤入扣(Stick Stack)。
遊戲配件
首先講講遊戲配件，開箱後會有一個黑色底座、一支黑色支柱、一個顏色盤同埋一袋遊戲籤。
開始遊戲
呢個遊戲嘅Set-up好簡單，只需將支柱有彈簧果一邊插入底座，然後再將顏色盤接駁喺支柱另一邊上面就完成。
遊戲玩法
玩法都係好簡單，就係每人輪流抽一支遊戲籤出黎，然後放喺顏色盤上面。但遊戲籤上面有唔同顏色，無論支籤掂到任何野都係要啱返相應嘅顏色。
唔好唔記得白色都計！所以如果你地玩熟，呢啲冒險嘅擺法都係可以做到架！
如此類推，跟住呢個簡單嘅規則玩，慢慢疊高左就會開始難玩架啦。
遊戲結束及勝負條件
一輪遊戲有兩個結束方法，方法一就係成個塔塌左或者所有遊戲籤都跌哂落黎，方法二就係用哂成個袋入邊嘅籤。另外，個塔未完全塌哂之前，任何時候只要有遊戲籤跌左落黎，就將果啲遊戲籤放喺整跌佢地嘅兇手面前，因為係用黎計分，支等於一分。而如果個遊戲係由方法一完結，兇手則加五分。只要有人到左11分或以上，個遊戲就正式完結。所謂嘅分其實係罰，最多嘅就輸，最少嘅就贏。如果完左一輪都未有人到11分，就重新玩多次，但分數繼續積上去。不過作者玩咁多次都會將呢個遊戲當層層疊咁玩，總之塌就輸，唔塌但用哂就睇邊個最多分就輸，唔一定要跟足11分呢個規則嘅。
整體評價
用腦度: ★☆☆☆☆
刺激度: ★★★★★
美觀度: ★★★★☆
友誼度: ★★★☆☆
方便度: ★★★★☆
耐玩度: ★★★★☆
呢個遊戲係層層疊嘅朋友，個概念係非常之似，但係因為獨特嘅遊戲設計，玩家一步一步用籤建起呢個搖搖欲墜嘅塔，令到呢個遊戲嘅張力可以話比層層疊更高。而遊戲籤有唔同顏色，睇起上黎其實都幾靚。所以如果一大班朋友想搵啲特別嘅輕鬆小品玩下，呢個遊戲絕對係一個好選擇。
遵理生活訂購連結:
註:
用腦度是指智力需求，高分數代表遊戲需要玩家大量投入思考、策略或計算。
刺激度是指玩嘅時候嘅氣氛，高分數代表呢個遊戲容易炒熱氣氛，甚至會引起玩家慘叫或歡呼。
美觀度就係遊戲硬件精唔精美。
友誼度就係解對友誼嘅影響。如果好低分就表示呢個遊戲如果太take it serious就有破壞友誼嘅風險(例monopoly)，如果高分就代表多合作機會，可以有利於友誼建立。
方便度係容唔容易set up同埋拎出街玩。
耐玩度係解個遊戲會唔會令人玩再玩。如果低分就代表個遊戲好易厭，不宜同一日玩太多次。
作者: 90後桌遊學好者，先後做過桌遊社社長及Boardgame Partyroom 店主
