經過連續兩個月嘅情人節洗禮後，相信各位單身狗已經被虐得傷痕累累，嚟到今個月14號，單身狗們嘅福音來了，終於都可以過情人節啦！
呢個專為單身人士而設嘅節日，叫做｢黑色情人節｣(Black Day)，起源自韓國。顧名思義同｢白色情人節｣背道而馳，佢嘅出現係為咗俾各單身人士能夠感受過節氣氛，彌補情人節無人陪同收唔到禮物嘅遺憾。
咁呢一日會做啲咩呢？韓國嘅單身男女會施展渾身解數去展現自己嘅怨念，佢哋會著上一身黑色衫，約埋一齊食黑色炸醬麵，或者一系列黑色食物同飲品，好似黑咖啡咁(黑朱古力除外)。聚會過程中，大家會互相寒暄打氣，亦係認識新朋友嘅好機會，甚至有幸可以出pool添！
不過今時今日，愈嚟愈多人都覺得單身唔係一件可憐嘅事，開始享受單身，一個人反而更自在！所以｢黑色情人節｣已經唔再局限單身嘅人慶祝，而係一堆朋友一齊玩！就算無情人都唔可以虧待自己嘛！
(圖片來源：網上)
