年輕一輩未必知道農曆新年嘅傳統禁忌，稍一不慎就可能觸犯一二，影響來年運程，如果想下一年順順利利，平安大吉，以下五點你就要留意啦！
1.年初一
大年初一係一年嘅開始，所以尤其重要！根據傳統唔可以洗澡、洗頭丶洗衣服等，因為「洗」同「死」係諧音，所以要盡量避免，否則會將好運氣及財運都洗走。另外，都唔好同瞓緊覺嘅人拜年，因為會令對方一整年都係病床上。又要注意忌殺生及用刀，因為刀意味著凶丶破，有唔吉利嘅意思。
2.年初二
年初二係已出嫁嘅女返娘家嘅日子，切忌回門禮物用單數，因為單數一般係用於白事，傳統上覺得唔吉利，所以帶返娘家嘅禮物必需成雙。年初二同樣忌洗衣，因為傳說初一丶二呢兩日係水神生日。
3.年初三
年初三又名赤口或者赤狗日，赤狗係「熛怒之神」，遇到佢會有凶事，而且容易招致口舌之爭，所以赤口日不適宜外出亦不宜拜年，大家應該留係家中。
4.年初四
根據民間習俗，大年初四屬於接神日，大家應該留守家中迎接眾神，等待灶王爺及家神返嚟守護家人，所以同樣不宜外出。
5.年初五
年初五有「破五」之稱，即是之前四日嘅禁忌可以喺呢一日破除。初一到初四堆積嘅垃圾稱為「財氣」，但直到初五之後就會變成「窮氣」，所以係年初五要將過年期間所有垃圾清除乾淨，否則會帶來窮困破財嘅後果。
大家都希望過一個「肥年」，所以喺新春假期玩樂期間，都唔好忘記傳統習俗禁忌呀！
圖：網上圖片
