除了情人節，2月14日還是Youtube的成立日

2月14日，除咗係情人節，仲係咩日子呢？就係影片分享網站YouTube嘅成立日啦！YouTube喺2005年2月14日由陳士駿、Cha Hurley同Jawed Karim創立。同Apple公司一樣，YouTube最初嘅office只係間簡陋嘅車房，但創辦一年幾就喺2006年10月被Google 以16.5億美元收購，非常巴閉，今日已經係世界上第三大網站(僅次於Google及Facebook)，並對之後出現嘅同類網站有深遠影響。

【延伸閱讀】第一代IPhone面世11年 – 喬布斯的人生哲學

YouTube第一部影片係《我在動物園》（Me at the zoo），由創辦人Jawed Karim 於2005年4月23日上載，只有短短19秒，內容係Karim企喺大象前面並表示佢哋個鼻好長，好酷……影片無特別之處，但別具象徵意義，代表網絡媒體迎接新開端，自始YouTube開始孕育千千萬萬風靡全世界嘅影片。

YouTube嘅創辦原意係想提供一個方便朋友之間分享錄影片段，儲存回憶嘅平台。隨住佢嘅發展同普及化，影片範疇愈嚟愈豐富，除咗個人影片，YouTube仲同多個媒體公司如VEVO、BBC等合作，提供電視節目、電影片段，音樂錄影帶，運動比賽轉播及家居錄影等多元化內容。每日全球觀看量超過10億，影片上載量數以萬計嘅YouTube，芸芸影片中，你知唔知道邊一段擁有最多觀看次數呢？答案係舊年發行嘅西班牙文歌Despacito，觀看次數至今已達到4,810,436,809*，係YouTube史上首個達到40億嘅視頻，同時亦獲得最多like。另外榜上*嘅影片幾乎都係音樂影片，印證咗音樂係跨越種族同文化嘅國際語言，亦顯示YouTube喺推動文化交流｢全球化｣上極具影響力。

YouTube嘅影響力並非僅限於此，佢顛覆以往公司依賴傳統媒體推廣產品嘅模式，愈嚟愈多公司/機構都擁有自己嘅頻道，將品牌推廣轉移到YouTube。由於觀眾能夠喺YouTube自行選擇真正想睇、覺得有趣嘅內容，因此品牌及廣告商要尋找目標群就容易得多。而呢種現象亦漸趨｢個人化｣，唔少人利用YouTube「推銷」自己，創作者上載音樂、電影、美容等唔同題材嘅作品，吸納大批支持者，Justin Bieber當初就係喺YouTube上載翻唱作品而成名，香港都有一班KOL/ Youtuber應運而生，佢哋嘅影響力之大，足以引發話題，牽動情緒。