無論係一家大細，抑或係一大班朋友，只要聚埋一齊就一定需要娛樂。但一般黎講大家都只係識玩下層層疊、UNO、狼人，頂多可能都係玩下三國殺。作者有見及此，黎緊希望不時會同大家分享一啲有趣嘅遊戲選擇，等大家可以唔使玩黎玩去都係果幾樣啦！今日嘅主角就係可謂變奏版UNO嘅SoloMino。
遊戲配件
配件係純紙牌，一共有120張。每張卡上面都有上下兩格，正正就係呢個Design令到個遊戲好刺激。到底呢個遊戲係點玩？之後嘅部份就會詳細揭曉。
開始遊戲
首先每人派8張牌，然後由牌副頂抽一張揭出黎做枱面上第一張卡，遊戲正式開始。
遊戲玩法
玩法其實同UNO非常相似，只要係同色或者同符號/數字就可以放上去。不過唔同嘅係每張卡有兩格，所以今次係要睇枱上面「卡陣」嘅兩側而決定自己張卡出唔出得，出得嘅話就將張卡駁上去枱面上嘅卡(如下圖)。同UNO一樣，出唔到卡就抽一張啦。
⇧就係咁樣放卡落去，然後下家就係要睇個問號同埋個＋黎出卡啦
不過，眾所周知UNO最刺激嘅就係Cut牌，呢個Game都有，只要你啲卡有一格係同「卡陣」最盡嘅兩側其中一格同色同符號/數字，就可以Cut牌，亦即係唔使跟次序直接出一張卡。
⇧例如呢個情況，我就可以cut張黃色4去右邊啦。
基本上出牌方法就講哂啦。可能有讀者睇到呢度就會問啲功能卡(符號卡)有咩特別呢？首先本身UNO有嘅果啲佢都會有齊，只不過就冇左轉色同埋draw永遠都只會係1。呢個Game另外再加左幾個功能卡，全部都好過癮，例如有一張就係大家都要將成副手牌傳比左手邊嘅人，如果你本身已經last card，就要將果張last card比左左手邊果個人，然後收取右手邊玩家副手牌，可謂世家大轉移。至於啲功能卡點先會發動？就係只要你果張卡出得到，而上面其中一格有功能就會發動。
遊戲結束及勝負條件
既然叫得變奏版UNO，勝出條件當然係用哂所有手牌就贏。
整體評價
用腦度: ★★☆☆☆
刺激度: ★★★★★
美觀度: ★★★☆☆
友誼度: ★★☆☆☆
方便度: ★★★★★
耐玩度: ★★★☆☆
呢個遊戲雖然有好多概念都同UNO好似，但一卡兩格嘅設計令呢個遊戲玩起上黎感覺似係一個唔同嘅遊戲。其中加左唔少刺激嘅功能牌更加令氣氛非常好。不過呢個遊戲有一個問題就係有少少亂，因為玩家睇住兩側出牌，偶爾會發生兩邊同時Cut牌而又唔知判邊個先嘅情況。不過有時Party出現下呢啲小混亂其實都可以炒熱氣氛。所以簡單黎講，SoloMino係個唔錯嘅Party game，考反應之餘又唔使點用腦。
遵理生活訂購連結:
註:
用腦度是指智力需求，高分數代表遊戲需要玩家大量投入思考、策略或計算。
刺激度是指玩嘅時候嘅氣氛，高分數代表呢個遊戲容易炒熱氣氛，甚至會引起玩家慘叫或歡呼。
美觀度就係遊戲硬件精唔精美。
友誼度就係解對友誼嘅影響。如果好低分就表示呢個遊戲如果太take it serious就有破壞友誼嘅風險(例monopoly)，如果高分就代表多合作機會，可以有利於友誼建立。
方便度係容唔容易set up同埋拎出街玩。
耐玩度係解個遊戲會唔會令人玩再玩。如果低分就代表個遊戲好易厭，不宜同一日玩太多次。
作者: 90後桌遊學好者，先後做過桌遊社社長及Boardgame Partyroom 店主
