有人覺得做嘢要充足準備。甚至未雨綢繆。承然，有啲行業一定要。好似做律師咁，你唔準備好文件，上到法庭又點搞？
但係，係生命裡面，有太多嘅嘢，係唔需要嘅。邱吉爾喺自己本自傳”My Early Life”度寫到，你永遠唔會對某樣嘢準備充足。當一個難關來臨時，能做嘅，就係當佢係一個跨欄 – 欄衝到埋黎，就跳。
佢講緊嘅係當時面對即將要人生第一次上台演講嘅時候。
佢本早期自傳，分享嘅，係佢人生頭25年。我幾年前睇過後，深深受益。秉持著佢呢種精神，我一直覺得自己今年喺做唔同嘢嘅時候都自信滿滿，無往不利。
香港人無論多聰明，好多都經常面對 procrastination 嘅問題
時候未到，就唔會開始動筆動手。好笑嘅，係我地自己覺得自己有問題，但係又解決唔到。亞里士多德還是蘇格拉底講過（兩者另外嗰位則持相反意見），人類係可以知道正確嘅事情/做法係咩，但卻因為軟弱而做唔到。我同意，卻唔覺得procrastination其實係真正嘅問題。
首先，做嘢好多時唔係要準備充足先要做。呢個觀念，係要試過百足咁多爪嘅人先會特別明白。陶傑以前同我錄嘢就教過我（而且係好以身作則地），根本唔係rehearsal、對稿，甚至寫稿 – 開機，有料嘅，自然會使出勁地娓娓道來。
跟大佬學玩嘢，自然發覺自己做起咩都可以話黎就黎。寫文，我只要開始下筆就會有嘢到；Viu做主持，久而久之writer都唔需要事前俾稿我背- 現場睇兩眼，然後自由發揮，效果仲好；寫書，我3個禮拜逼自己坐喺張書檯就黎料；做節目嘉賓、拍短片廣告，我基本上唔洗準備話黎就黎。
其次，就係將心情同工作分開。好多人，要有mood先可以做認真嘢。認真，唔係時時都有心情㗎 – 以我為例，我做嘢幾乎一半時間其實都冇feel。So？只要告訴自己是時候做，然後直接開波，你會發現，一開始咗就唔會停。詳細研究，請參考 Happiness By Design 一書。
人生冇take 2。活在當下，話黎就黎，爽也。
