仲有幾日就到聖誕啦，大家買好晒禮物準備參加聖誕party未呀？一大班朋友交換禮物本身係一件開心嘅事，但係如果收到啲無用又或者「騎呢」嘅聖誕禮物，都真係幾掃興。唔想送禮變成製造垃圾，可以參考下以下幾樣唔想收到嘅聖誕禮物。
- 杯
第一樣禮物大家應該非常認同，理由都唔需要多講。除咗誠意欠奉，無論係水杯、茶杯、保溫杯定其他茶具，每個人都至少有一兩個，但嘴就只有一個，根本用唔到咁多啊！
- 化妝品/護膚品
送化妝品同護膚品表面上好似好得體，但呢種用品始終係根據膚質同需要選擇，唔少人都有自己鍾愛同慣用嘅牌子，所以如果對收禮物者唔太了解，貼身嘅化妝品/護膚品都係避免較好。
- 毛公仔
雖然好可愛(女仔覺得)，但唔實用又佔位置。有啲女仔仲會因為自己鍾意就買嚟送俾人，男仔收到嘅話，內心應該會崩潰同想爆粗。
- 風格太過突出嘅衣服/飾物
理由其實同化妝品差唔多，你覺得適合人嘅人哋可能完全唔鍾意。著衫好睇個人品味，身材同氣質，如果我著開muji文青風，你送件性感露臍衫俾我，件衫成世都見唔到我著架啦！
- 月曆/手帳
月曆同手帳其實頗為實用，不過依家好多人都直接用手機記事，或者人哋一早已經買咗，而又唔可以下年再用，咁呢份禮物最後都難免淪為｢垃圾｣。
- ｢懶｣好笑/零誠意嘅禮物
呢樣可能抽象少少，舉個例子，曾經有非常怕曱甴嘅朋友收到曱甴模型，當場喊出嚟，又例如買$100分量嘅牙籤同紙巾送俾人，令人非常無奈。可能送禮者覺得好玩、無傷大雅，但都好大可能會令人非常難堪，場面尷尬，暗藏｢絕交｣危機。所以玩還玩，都係適可為止好。
最後提提大家，送禮物都要留意身份同場合，例如貼身物品唔好送俾唔熟/普通朋友，送俾長輩就要注意意頭同禁忌。未買禮物嘅朋友快啲趁著嚟緊幾日最後衝刺啦，祝大家有個美好聖誕，Merry Christmas!
*所有圖片均取自網上
