常言道：「健康就係財富！」想擁有富足人生必先擁有健康身體。但往往因為年紀漸長，新陳代謝又逐漸減慢，開始出現肥胖問題。面對以上情況，大家應該及早注意自己嘅飲食習慣，儘量減少攝取高糖丶高脂丶高膽固醇嘅食物，但日常生活中就係滿佈陷阱，以下係五款經常會接觸到嘅高卡路里飲品，大家會唔會都試過中招呢？
1.西瓜汁（140kcal/450ml）
假設係純天然100％鮮搾，無加入任何糖水或色素等成份，呢杯西瓜汁都已經含有對身體無益嘅游離糖，即相等於5粒方糖，不經意地攝取好多糖分，既然係咁不如食一片片嘅西瓜，比起榨汁嚟得更有益呢！
2.椰汁（213kcal/250ml）
以一杯椰汁為例，當中嘅椰奶含有大概三茶匙椰子油份量，而其中有91％屬於對人體無益嘅飽和脂肪，飽和脂肪含量比牛油仲要高，不但令人容易肥胖，亦有機會引起心血管疾病。
3.抹茶鮮奶（280kcal/455ml）
基本上抹茶對人體非常有益，可以抗氧化對皮膚又好，又可以增強血管彈性。但市面上好多店舖都會係抹茶粉內加入糖，令顧客係不知不覺間攝取過多糖份，糖就係致肥嘅元兇，所以都係少飲為妙！
4.凍朱古力（440kcal/455ml）
朱古力中含有可可脂，所以含油量比較高，卡路里亦唔少，當中含糖量相等於8粒方糖，如果想消耗一杯凍朱古力嘅熱量，最少要跑步1小時先可以啦！
5.珍珠奶茶（470kcal/650ml）
珍珠奶茶當中主要成份就係奶精，呢類奶精含有反式脂肪，對心血管疾病構成影響。另外以薯粉製成嘅珍珠含有大量澱粉質，經糖水烹調之後，只要食一湯匙珍珠，就相等於食兩湯匙嘅飯，熱量甚高！
相信大家都可能試過誤墮以上陷阱，經過對飲品成份有更深入了解後，大家都要為自己健康著想，做一個識飲識食嘅人啦！
