有時到日本旅遊，經過一輪血拼，加上日追夜趕行程，難免感到筋竭力疲，此時最好不過去光顧一下泡湯場！將所有疲倦頓時消㪚，又可以繼續行程！今次小編搜羅五大東京泡湯好去處，有機會一定要試試呀！
1)有貓頭鷹出沒嘅山之湯
位於距離有樂町線要町站10分鐘路程嘅大眾澡堂山之湯，山之湯浴池裡面分成兩層，上層係水溫大約43度嘅氣泡浴，底層則係溫度高出2-3度嘅水柱按摩浴。浴池水都係抽取地底200米深井水，再經過燒柴煮熱，可以溫和地讓身體暖和。最特別係山之湯嘅女湯浴池正中央有隻貓頭鷹站崗，貓頭鷹係日本人心目中可以喚來好運，難道真係可以泡出個好運來？
2)與小黃鴨共浴嘅羽衣湯
西新宿五丁目車站附近嘅羽衣湯，擁有超過50年歷史，除有大浴池外，另設有露天浴池丶水柱按摩浴池丶電流浴池丶冷水浴池及鹽浴池等，每逢星期日羽衣湯嘅露天浴池都會舉辦小黃鴨隊長共浴活動，泡湯樂趣隨即倍增，所以經常吸引到一眾泡湯迷到訪！
3)東京都第一美肌黑湯天神湯
天神湯係東京都內腐植質濃度最高嘅黑湯，腐植質即是100萬年前草木腐爛後，經過長時間溶入地下水中嘅一種物質，當中含有腐植質嘅植物性泉，保濕效果極佳，能夠令肌膚光滑細嫩。
4)牛奶浴池及電流浴池之選湊湯
位於東京車站旁邊嘅湊湯，距離八丁堀車站只需步行5分鐘。澡堂中分成雅致黑石與溫暖木紋兩種浴場，推薦各位試試有超微細氣泡嘅牛奶浴池，水中氣泡能迅速提升身體血液循環。而另一電流浴池則有微弱電流於浴池內流動，可以充分暖和身體，為身體帶來恰到好處嘅舒暢感。
5)可以欣賞油畫藝術嘅戸越銀座温泉
戶越銀座係東京都內歷史最悠久嘅大型商店街，街內嘅戶越銀座溫泉除有天然黑湯溫泉外，更設有月之湯及陽之湯兩區。月之湯內有寢浴池丶冷水浴池及超音波浴池等設備，而陽之湯內則有軟水碳酸泉丶遠紅外線及電流浴池。而澡堂中一大亮點係月之湯內嘅黑湯浴池可以一覽日本僅存三名澡堂繪畫師之一中島盛夫嘅作品，繪畫師超凡技巧將靜岡縣呈現於澡堂空間中，令人身心都得以放鬆。
以上五間東京大眾澡堂都位處交通方便嘅地點，有機會不妨善用觀光景點遊玩嘅空檔時間，感受一下大眾澡堂嘅療癒魅力。
