不論男女老少都鍾意穿着針織毛衣，受歡迎嘅理由實在多不勝數，不但容易配襯而且具時尚感，同時有足夠保暖。然而，好多鍾情冷衫毛衣嘅人都可能面對同一個問題，就係縮水！大部份人認為一旦冷衫縮水就要作廢，今次小編就為大家介紹五個拯救冷衫嘅招數，將縮水冷衫還原到好似新買時候一樣！
1）冷衫柔順劑
市面上有好多專洗冷衫嘅柔順劑，可以令冷衫變軟及回復彈性。只要用凍水加入柔順劑，浸泡大約一小時，最後平放等待風乾，縮水冷衫就可以回復原狀。
2）使用蒸氣
首先將冷衫洗乾淨，然後用乾淨嘅白布將冷衫包住，再放到煲裡面蒸大約十分鐘，然後取出冷衫，此時冷衫已經變軟，你可以輕輕拉扯冷衫縮水嘅部分，再等待風乾。
3）到乾洗店處理
乾洗店一般都可以幫客人還原縮水冷衫，只要將冷衫交俾乾洗店店員，佢就會為你尋找同冷衫相同型號大小嘅特製衣架，並將冷毛衣進行高溫蒸汽處理，當你取回衣服時，已經回復原狀啦！
4）衣夾加紙板
紙板加衣夾原理係趁冷衫未乾透之前，用紙板將冷衫撐為原形。可以先剪一塊比冷衫大嘅紙板或者同原本冷衫大小相同嘅紙板，然後將冷衫套上紙板，用衣夾固定各邊端，最後平放風乾便可。
5）清水加護髮素
部分護髮素成分裡面都有加入阿蒙尼亞水，而阿蒙尼亞水同時廣泛地應用於大部分冷衫製作上，為冷衫保持彈性。所以用護髮素加清水浸洗冷衫可以軟化冷衫纖維，繼而膨脹，冷衫就可以恢復原狀。
「預防勝於治療」所以應及早防止冷衫縮水，例如：用合適水溫清洗丶避免機洗及吊囇丶小心使用乾衣機等。只要記住以上方法，衣櫃裡嘅冷衫都可以歷久常新！
