一個燦爛又自信嘅笑容絕對可以提升個人形象，但如果牙齒又黃又髒就變得大打折扣，亦無信心開懷大笑。如果想為牙齒美白但資金有限，就要留意以下小編介紹嘅小方法，無需要大花金錢都可以有效美白牙齒！
1）用椰子油漱口
椰子油蘊含月桂酸係天然嘅抗生素，而所含嘅中鏈脂肪酸亦有抗菌及消炎作用。利用椰子油漱口可以吸走口腔內牙縫中以及牙根管嘅細菌，同時清潔牙齒表面，去除污垢及牙漬，達致美白牙齒。
2）香蕉皮去牙漬
香蕉皮蘊含豐富礦物質，例如鉀丶鎂及錳，能夠被牙齒吸收而且具有美白牙齒功效。只要以香蕉皮內側摩擦牙齒表面，直至香蕉皮喺牙齒表面形成膏狀，再待10至15分鐘後刷牙，可以去除牙垢及牙漬，而香蕉皮無腐蝕性，所以可以喺唔損害牙齒情況下美白牙齒。
3）菠蘿美白除污漬
菠蘿含有菠蘿蛋白酶係天然嘅去污美白劑，菠蘿蛋白酶能有效清潔積聚喺牙床嘅細菌，可以清除牙菌斑丶牙漬及牙垢，從而美白牙齒。而菠蘿亦可鞏固牙齒，促進牙齦健康，大家可以試試用紗布沾取菠蘿汁擦拭牙齒，清除牙漬。
4）自製美白牙膏
梳打粉具有清潔作用，當中所含碳酸氫鈉可去除牙齒污漬及茶漬，而士多啤梨則蘊含葉酸，有助清潔牙齒，將兩者混合就成為天然美白牙膏，有助美白牙齒，但為免破壞琺琅質保護層，此方法不應使用太頻密，每星期一次已足夠。
5）多食士多啤梨及蘋果
士多啤梨當中蘊含葉酸及蘋果酸，有助去除牙齒表面著色物質，清除牙漬，而蘋果中化蘋果酸亦能溶解著色物質，預防牙齒變色，蘋果嘅纖維有助清潔牙齒。所以多食士多啤梨及蘋果都有助美白牙齒。
要進一步維持牙齒健康亮白，都需要每3個月到牙醫診所洗牙，因為牙齒會不斷積聚頑固牙垢牙石，需要牙醫幫忙先可以徹底清除，記緊保持牙齒亮白之外，都要注意維持口腔健康。
