港人特別鍾意飯後甜品，尤其一大班朋友聚餐後，通常都會去光顧甜品店，但港式糖水卡路里都好高，如果無配合足夠運動，好容易因此致肥！大家可以參考以下卡路里指標，小心挑選甜品，免招肥胖！
1）芒果黑糯米（290卡监里/碗）
黑糯米本身其實好健康，但芒果黑糯米當中最肥成分係椰汁，一碗所含卡路里要跑步38分鐘去消耗。怕肥人士最好走椰汁，或者配芒果食都可以增加甜度。
2）湯圓（313卡路里/5粒）
湯圓內麻蓉餡料有較多油份，加上用糯米皮包着再加糖水烹調，卡路里因而增高，食用時建議可選擇較細粒、少餡料嘅湯圓。
3）芝麻糊（320卡路里/碗）
黑芝麻含鐵質及鈣質，係頭髮生長必須嘅營養素，當中所包含嘅飽和脂肪亦可以令頭髮光澤，不過卡路里偏高，要跑步42分鐘先消耗一碗芝麻糊嘅卡路里！
4）腐竹雞蛋糖水（1342卡路里/碗）
腐竹係由豆漿浮面嘅一層豆油造成，脂肪含量偏高，不過其油分屬於有益身體的，都適合想增磅人士，如果想消耗一碗腐竹雞蛋糖水需跑步44分鐘。
5）涼粉西米露（353卡路里/碗）
涼粉本屬低卡食品，但加上椰汁西米露就增加不少卡路里，如果想健康一點可以配上鮮果，並且要少糖水少椰汁，切記唔好選用罐頭雜果。
好多減肥人士都誤以為糖水比較健康，甚至將糖水當成正餐進食，希望達致減肥效果，但其實並不完全正確。經過以上營養師分析後，相信大家日後都會懂得精挑細選令自己健康嘅食物。
