《萬千星輝頒獎典禮2017》啱啱喺上星期日播出，今年嘅頒獎禮為觀眾帶嚟唔少｢驚喜｣，除咗多個獎項得主爆冷令人大跌眼鏡外，蔡康年主持紅地氈儀式時瘋狂讀錯名事件都足以令網民食花生食到滯。TVB近年淪為網民嫌棄同恥笑嘅對象，推出嘅劇集/節目幾乎都難逃變成”膠劇”嘅命運，皆因劇集質量大不如前，演員又唔多吸引，後生仔女梗係投入韓/美劇嘅懷抱啦。
但其實，TVB都曾經有過輝煌嘅時候。以前科技無咁發達，睇電視係我哋唯一嘅消遣，如果你係80、90後，一定會記得好幾套細個睇嘅TVB神劇，當年叫好叫座，今日睇返都非常回味。以下5套劇集，就係我心目中嘅經典代表。
1. 十月初五的月光 (2000年)
呢套絕對可以話係tvb愛情劇中嘅經典，初哥哥同君好嘅感情係親情之上，偏偏無法昇華到愛情，相愛卻只差一點點，最後錯過大家嘅結局令人遺憾。故事無勾心鬥角嘅劇情，張智霖同佘詩曼完美演繹出個種想愛又不知所措、唯有默默守護嘅情懷，當年睇到好心噏，相信依家已經無演員可以做到呢種感覺。
初哥哥用盡全力開口嗌一聲媽，然後兩母子抱頭痛哭呢一幕好催淚。
而劇集嘅主題曲《祝君好》直到依家有唔少人仲loop緊，可想而知呢套劇係幾有感染力。
2. 無頭東宮 (2002年)
《無頭東宮》由陳妙瑛、向海嵐、張兆輝主演，講述性格迥異嘅淩雲同楚楚換面後愛恨交纏嘅故事。
劇集主題當時嚟講好新鮮，亦引人反思人只係睇外表而忽略內在。劇情好精彩緊湊，個個都好好戲，向海嵐同魏駿傑奸到出汁，當年睇到我咬牙切齒。向海嵐嘅古裝look真係無得輸，靚到令人念念不忘，以前嘅女演員著古裝硬係有氣質啲！
3. 衝上雲霄 (2003年)
香港電視史上首套以航空業為題材嘅劇集，無論係演員班底、取景、專業指導同後期等等都係大製作。劇中吳鎮宇、陳慧珊、馬德鐘等主角扮起機師空姐上嚟非常專業，當年Sam哥同Vincent迷死人，亦令人對航空業充滿憧憬，所以播出後掀起風潮，投考機師空姐人數大增。劇集仲遠赴羅馬、佛羅倫斯、札幌等地拍攝，靚人靚景之下，劇中嘅幾角戀都拍得特別浪漫。
4. 妙手仁心 (1998年)
另一套受歡迎嘅職業劇，總共有三輯，參演陣容鼎盛，包括吳啟華、林保怡、陳 豪、黎姿、吳美珩、邵美琪、廖碧兒等，依家已經唔會再見到呢個班底。《妙手仁心》製作認真，劇中嘅醫學常識及場景都非常逼真，近年製作成本｢縮水｣、劇情牽強嘅”膠劇”完全比唔上。
今時今日，見到吳啟華都仲想叫佢程至美，除此之外，一眾顏值高嘅女醫生非常有睇頭，吳美珩飾演嘅骨科醫生又型又有仙氣，係我當年最愛！
5. 封神榜 (2001年)
我對以前嘅古裝劇有種情義結，《封神榜》就係我的最愛，無論重播幾多次都睇得津津有味。佢能夠成為堅神劇，係因為劇中嘅原素多、感情線豐富又感人，好似殷十娘 (苑瓊丹) 同哪吒 (陳浩民)嘅母子情，特別係雨中打仔同削骨還父、削肉還母一幕令人動容。
仲有蓮花 (葉璇)對哪吒嘅深情，溫碧霞演嘅妲己由天真善良到心腸歹毒嘅變化……一眾演員都做得有血有肉。
《封神榜》過後，真係再無其他神話劇能夠媲美！
00後嘅讀者們，應該好難想像你哋出世前，tvb劇嘅風靡程度係同依家嘅韓劇一樣。雖然時代已經唔同，唔應該再成日講以前，但真心覺得，有幸睇住tvb劇長大嘅80、90後，實在係擁有一個快樂童年。
資料來源：tvb官網、維基百科
圖：tvb官網、網上圖片
