雖然香港未有地震紀錄，不過一向熱愛旅遊嘅港人，難免會去一啲位處地震帶嘅國家，所以學習一下基本求生知識亦無妨。地震就係因為板塊移動積聚壓力突然釋放而引起，永遠防不勝防。正因為地震唔知幾時會發生，應該隨時做好準備。今次就為各位介紹五種災害應變必備物品。
1.濕紙巾
當地震時，好大機會因為停水而無辦法沖涼，濕紙巾就可以用嚟擦臉擦身，保持個人衛生。而含有酒精嘅濕紙巾仲可以用嚟消毒，相當有用。
2.零食
零食可以快捷方便地補充能量，而甜食仲具有療癒身心嘅效果，可產生愉悅感覺。最重要係唔使烹調、容易保存，非常便利，特別係以罐裝保存嘅零食最適合作為地震時應急食物。
3.報紙
平日毫不起眼嘅報紙，只要將佢揉成一團，塞到衣服下面就會有保暖效果。另外，揉成一團嘅報紙塞入塑膠袋中就可以代替枕頭或棉被，當身處寒冷晚上時，報紙就變得非常有用。
4.塑膠袋
當地震停水時，用報紙摺成紙碗，再放上塑膠袋，就可以作為臨時嘅盛載器皿。如果將膠袋剪開後，落雨時仲可以當成雨衣。
5.女性衛生巾
女性必備嘅生理用品，係無法洗內衣褲嘅情況下，用更換衛生巾嘅方法可以度過一陣子時間。由於災區嘅生理用品一般比較短缺，所以最好為自己準備。
以上都係地震必備用品，建議全部放入一個便攜袋內，放喺當眼處，萬一地震發生，都可以即刻帶走逃生。
