近幾年，越來越多香港人鍾意到福岡旅遊，當地嘅新鮮魚生丶壽司丶拉麵的確非常吸引，除咗食盡當地美食，影盡當地靚景，如果想將愉快嘅旅行回憶得以延續，少不免要買一啲手信，以下就係小編為大家介紹嘅五大人氣手信，唔知會唔會勾起你對福岡嘅回憶呢？
1.博多豚骨拉麵「名島亭」
地點：味藏
嚟到福岡點可以錯過當地嘅拉麵呢！除咗一蘭、一風堂等知名連鎖拉麵店之外，梗係要試啲特別款式啦！呢款味藏嘅「博多豚骨拉麵 名島亭」，係將著名「名島亭」拉麵加工成可以喺屋企品嚐嘅半熟麵包裝，非常適合買嚟做手信送俾親朋戚友。
2.博多貓舌餅乾
地址：福岡県福岡市中央区天神1丁目4-1
由八女茶玉露抹茶老鋪茶屋所製作嘅「博多貓舌餅乾」，外型好似貓舌頭，味道帶有濃濃抹茶香，再配上白朱古力夾心，全部經專業茶師嚴選茶葉製作而成，如果你同小編一樣係「抹茶控」就千祈唔好錯過啦！
3.草莓牛奶「博多之女」
地址：福岡県福岡市東区馬出6-15-21 （二鶴堂本店）
「博多之女」即是指以年輪蛋糕包住羊羹嘅點心，係博多人嘅懷舊甜點。今次推介俾大家嘅呢款就係以福岡引以為傲嘅草莓，配合牛奶羊羹製成，口味獨特，絕對係做手信嘅佳品！
4.小鷄饅頭
地址：福岡県福岡市博多区博多駅中央街1－1（ひよ子本舗吉野堂 マイング店）
ひよ子本舗吉野堂出品嘅「小雞饅頭頭」，如果親朋好友收到應該會愛不釋手。而福岡限定嘅家族造型係米非常令人心動呢！嚟到福岡，記得要帶埋可愛嘅小雞家族返屋企啦！
5.辣味明太子醬
地址：福岡縣福岡市中央區大名2-2-17 （理亭稚加榮）
要數到福岡特產必定包括明太子，大家都會想將明太子嘅美味帶走同朋友分享，咁最方便一定係膏狀明太子醬，因為以牙膏式包裝，方便攜帶。而博多知名料理店「理亭稚加榮」售賣嘅辣味明太子醬」，連福岡機場都可以買到，非常方便。
想將福岡嘅風情帶返香港同朋友分享，買返幾樣特色手信就少不免啦！
